Қазақстан хоккейден әлем чемпионатын қабылдауы мүмкін

Ресей хоккей федерациясының бірінші вице-президенті Роман Ротенберг халықаралық жарыстарды Қазақстан мен Қытайда өткізу мүмкіндігін ұсынды, деп хабарлайды Sport12.kz.

Оның пікірінше, егер турнир ұйымдастырушыларының бірі Ресей құрамасын жарысқа жіберуден бас тартса, әлем чемпионатын Азия елдерінде өткізуге болады.

Бұған дейін Спорттық арбитраж соты Халықаралық хоккей федерациясын Ресей құрамаларын халықаралық жарыстарға қатыстыруға міндеттеген еді. Алайда Швеция, Норвегия, Финляндия және Латвия хоккей федерациялары өз командаларының Ресеймен ойнамайтынын мәлімдеді.

Сонымен қатар Канада премьер-министрі Марк Карни алдағы жасөспірімдер арасындағы әлем чемпионатына қатысу үшін ресейлік спортшыларға виза берілмейтінін айтты. 2028 жылғы жасөспірімдер арасындағы әлем чемпионатын қабылдайтын Финляндия да ресейлік хоккейшілерді елге кіргізбейтінін жеткізген.

«Егер қандай да бір ел біздің жігіттеріміз бен қыздарымызды жарысқа қатыстырмаса, әлем чемпионатын Қазақстанда өткізу нұсқасын да қарастыру керек деп ойлаймын. Бұл – толықтай тәуелсіз мемлекет. Азияда да әлем чемпионаттарын өткізуге болады. Таиландта болдық, онда қажетті инфрақұрылым бар. Қытайда да мұндай жарыстарды ұйымдастыруға мүмкіндік бар. Мәселеге кеңірек қарау қажет», – деді Ротенберг.

Айта кетейік, 2022 жылы Бейжіңде өткен қысқы Олимпиада ойындарында Ресей хоккейшілері күміс жүлдеге ие болған. Ал Қазақстан 2027 жылғы әлем чемпионатын өткізу құқығы үшін Германиямен бәсекеге түскен еді.

Біздің серіктес: Sport12kz