Дана Уайт Қазақстанда UFC турнирі қашан өтетінін айтты

UFC президенті Дана Уайт ұйымның Қазақстанда турнир өткізу мәселесі бойынша жұмыс жүргізіп жатқанын мәлімдеді, деп хабарлайды Sport12.kz.

— UFC турнирі Қазақстанда қашан өтеді?

— Жақын арада. Біз осы бағытта жұмыс істеп жатырмыз, — деп жауап берді Дана Уайт.

Қазіргі таңда UFC-де Қазақстан атынан бес спортшы өнер көрсетеді. Олар — Шавкат Рахмонов (19-0), Асу Алмабаев (24-3), Дияр Нұрғожай (12-2), Николай Веретенников (14-8) және Әліби Ыдырыс (10-1, 1 NC).

Осы уақытқа дейін Орталық Азияда UFC турнирлері өткізілген жоқ. Ұйым шоуларының басым бөлігін АҚШ-та, соның ішінде Лас-Вегаста ұйымдастырады. Сонымен қатар Канада, Бразилия, Ұлыбритания, Аустралия және Біріккен Араб Әмірліктері де UFC турнирлері тұрақты өтетін елдердің қатарында.

Қазақстанда UFC турнирін алғаш рет 2020 жылғы 13 маусымда Астанада өткізу жоспарланған еді. Алайда коронавирус пандемиясына байланысты іс-шара өтпей қалды.

Біздің серіктес: Sport12kz