Асу Алмабаевтың бапкері Хоригутиге қарсы жекпе-жектің жоспарын ашты

DAR Team командасының бас бапкері Эдуард Базров қазақстандық Асу Алмабаевтың UFC-де жапониялық Кёдзи Хоригутиге қарсы жекпе-жегіне қатысты жоспарын айтты, деп хабарлайды Sport12.kz.

Маманның сөзінше, команда мерзімінен бұрын жеңіске жетуді мақсат етіп отырған жоқ. Басты міндет – жекпе-жекте өз жоспарын орындап, қарсыластың осал тұстарын пайдалану.

«Бізде жекпе-жекті мерзімінен бұрын аяқтау туралы нақты тапсырма жоқ. Алдағы кездесуде бар күшімізді салуымыз керек. Қарсылас өте мықты. Өз жоспарымыз бойынша әрекет етіп, оның әлсіз тұстарын пайдаланып, өзіміздің артықшылықтарымызды көрсетуіміз қажет. Біз үшін ең бастысы – жеңіс», – деді Эдуард Базров.

Асу Алмабаев пен Кёдзи Хоригути арасындағы жекпе-жек 21 қарашада Катарда өтетін UFC турнирінде ұйымдастырылады. Шоу Эр-Райян қаласындағы Ali Bin Hamad Al Attiyah аренасында өтеді.

UFC-дің аса жеңіл салмақтағы рейтингінде Хоригути жетінші, ал Алмабаев алтыншы орында тұр.

Біздің серіктес: Sport12kz