8 сағат бұрын
Қазақстан мен Индонезия ҰОК ынтымақтастық перспективаларын талқылады
Фото: Қазақстан ҰОК
Астанада Қазақстан Республикасы Ұлттық Олимпиадалық комитетінің өкілдері мен Индонезия Ұлттық Олимпиадалық комитеті президентінің кеңесшісі кіші-Мариус Визер арасында жұмыс кездесуі өтті, деп хабарлайды Sport12.kz.
Қазақстан тарапынан кездесуге бас директор Нұрлан Нөгербек пен Спорт департаментінің басшысы Бектұр Қиятбай қатысты.
Кездесу барысында тараптар екі елдің Ұлттық Олимпиадалық комитеттері арасындағы өзара іс-қимыл мәселелерін, сондай-ақ, алда өтетін ірі халықаралық спорт жарыстарын талқылады.
Бокс спортын дамыту мәселесіне ерекше назар аударылды. Индонезия өкілі Джакарта қаласында өткен 19 және 23 жасқа дейінгі спортшылар арасындағы Азия чемпионатының жоғары деңгейде ұйымдастырылғанын айтып, елде жастар спортын дамытуға басымдық берілетінін атап өтті.
Сондай-ақ кіші-Мариус Визер Индонезияның халықаралық спорт жобаларын жүзеге асыруға қатысты жоспарларымен бөлісті. Ол елдің «Болашақ ойындарын» өткізуге қызығушылық танытып отырғанын айтып, Азияның әлемдік спорт қозғалысындағы рөлінің артып келе жатқанын ерекше атап өтті.
Кездесу соңында тараптар серіктестік қарым-қатынасты одан әрі нығайтуға және Ұлттық Олимпиадалық комитеттердің негізгі бағыттар бойынша өзара байланысын кеңейтуге дайын екенін растады.
Еске салсақ, бұдан бұрын Астанада Қазақстан Республикасы мен Сербияның Ұлттық Олимпиадалық комитеттері өкілдерінің екіжақты кездесуі өтті.
Біздің серіктес: Olimpbet қосымшасын пайдалан
