Нариман Құрбанов әлем чемпионатында қолаға қол созым жерде сүрінді

Нидерландының Роттердам қаласында спорттық гимнастикадан өтіп жатқан әлем чемпионатында Қазақстан өкілі Нариман Құрбанов жүлдеге қол жеткізе алмады.

Париж Олимпиадасының күміс жүлдегері ат снарядындағы жаттығудың финалында 14,933 ұпай жинап, төртінші орынға тұрақтады. Қола медаль үшін қазақстандық гимнастқа небәрі 0,067 ұпай жетіспеді.

Бұл бағдарламада Армения спортшысы Гамлет Манукян 15,300 ұпаймен әлем чемпионы атанды. Италиялық Габриэле Таргетта 15,233 ұпай жинап, күміс медаль иеленсе, Мамикон Хачатрян 15,000 ұпаймен үздік үштікті түйіндеді.

Айта кетейік, Қазақстан спорттық гимнастикадан әлем чемпионатындағы соңғы жүлдесін 2023 жылы жеңіп алған. Сол кезде Милад Карими Бельгияда өткен әлем біріншілігінде еркін жаттығу бағдарламасы бойынша қола медальға ие болды.

Біздің серіктес: Sport12kz