Қазақстандық шаңғышы маусымның үздік үштігіне енді

Қазақстан құрамасының шаңғымен тұғырдан секіру спортшысы Данил Васильев жазғы Гран-при сериясының жалпы есебінде үшінші орынға ие болды, деп хабарлайды Sport12.kz.

Серияның соңғы кезеңі Германияның Клингенталь қаласында өтті. Маусым қорытындысы бойынша қазақстандық спортшы 201 ұпай жинап, үздік үштіктен көрінді.

Жалпы есепте 450 ұпай жинаған жапониялық Наоки Накамура жеңімпаз атанды. Екінші орынды 216 ұпаймен австриялық Даниэль Чофениг иеленді. Ал швейцариялық Грегор Дешванден 196 ұпаймен төртінші сатыға тұрақтады.

Данил Васильевтің жазғы Гран-при жалпы есебінде үшінші орын алуы Қазақстан үшін шаңғымен тұғырдан секіру спортындағы тарихи жетістік болды.

Біздің серіктес: Sport12kz