Михаил Шайдоров Гран-при финалына қатысу мүмкіндігінен айырылды

Қазақстандық мәнерлеп сырғанаушы, Олимпиада чемпионы Михаил Шайдоров 2026/2027 жылғы маусымдағы ISU Гран-при сериясының финалына қатысу мүмкіндігінен айырылды, деп хабарлайды Sport12.kz.

Үш кезеңнің қорытындысы бойынша қазақстандық спортшы жеті рейтингтік ұпай жинап, жалпы есепте 12-орынға тұрақтады. Шайдоров серия аясындағы екі мүмкіндігін де пайдаланып қойғандықтан, енді ұпай санын арттыра алмайды.

2026/2027 жылғы маусымның Гран-при финалы 10-13 желтоқсан аралығында Қытайдың Чунцин қаласында өтеді.

Мұндай нәтижеге Франциядағы кезеңдегі сәтсіз өнері де әсер етті. Шайдоров қысқа және еркін бағдарламалардың қорытындысы бойынша 206,55 ұпай жинап, оныншы орынға ие болды. Осы кезеңде ол рейтингтік ұпай еншілей алмады.

Ал Қытайдың Шэньчжэнь қаласында өткен келесі кезеңде қазақстандық спортшы нәтижесін жақсартып, бесінші орын алды. Ол 263,49 ұпай жинап, жалпы есепке жеті ұпай қосты.

Еске салайық, 2026 жылғы 13 ақпанда Михаил Шайдоров Милан мен Кортина-д’Ампеццода өткен қысқы Олимпиада ойындарында алтын медаль жеңіп алды. Қазақстандық спортшы екі бағдарламаның қорытындысы бойынша 291,58 ұпай жинап, ерлер арасындағы жеке сында чемпион атанды.

Біздің серіктес: Sport12kz