Бибісара Асаубаева блиц кезеңін жеңіссіз аяқтады

Қазақстандық шахматшы Бибісара Асаубаева Венгрияның Будапешт қаласында өтіп жатқан Total Chess World Championship Tour Pilot 2026 турнирінің блиц бағдарламасында соңғы орын алды, деп хабарлайды Sport12.kz.

Алтыншы турда Асаубаева өзбекстандық Нодирбек Абдусатторовпен кездесті. Ақ фигуралармен ойнаған қазақстандық шахматшы қарсыласына есе жіберді. Кейін өзбек гроссмейстері 2,5 ұпаймен 22-орынға тұрақтады.

Тоғыз турдың қорытындысы бойынша Бибісара Асаубаева небәрі 0,5 ұпай жинап, 24 қатысушының арасында соңғы орынға жайғасты. Ол сегіз партияда жеңіліп, жалғыз тең нәтижеге соңғы турда үндістандық Вайшали Рамешбабумен кездескенде қол жеткізді.

Блиц бағдарламасында норвегиялық Магнус Карлсен тоғыз мүмкіндіктің жетеуін пайдаланып, жеңімпаз атанды. Франциялық Максим Вашье-Лаграв 6,5 ұпаймен екінші орын алса, америкалық Левон Аронян алты ұпаймен үздік үштікті түйіндеді.

Айта кетейік, блиц кезеңі турнирдің алдын ала кезеңі саналады. Оның нәтижелері топтық кезеңдегі қосымша көрсеткіштерді анықтау және плей-офф кезеңіндегі жұптарды қалыптастыру кезінде ескеріледі.

Турнирдің негізгі кезеңі 11 қарашада басталады. Бибісара Асаубаева D тобына түсіп, Арджун Эригайси, Максим Вашье-Лаграв, Ханс Ниманн, Уэсли Со және Вайшали Рамешбабумен бірге сынға түседі.

Total Chess World Championship Tour Pilot 2026 жарысы 20 қарашаға дейін жалғасады. Турнир бағдарламасына блиц, рапид және жылдам классика форматтары енгізілген.

Біздің серіктес: Sport12kz