Қазақстан қоржынына әлем чемпионатынан тағы екі медаль түсті

Қазақстанның грек-рим күресінен ұлттық құрамасының екі өкілі АҚШ-тың Лас-Вегас қаласында өтіп жатқан 23 жасқа дейінгі балуандар арасындағы әлем чемпионатында қола жүлдегер атанды, деп хабарлайды Sport12.kz.

55 келіге дейінгі салмақ дәрежесінде Арсен Жұма қола медаль жеңіп алды. Ол ширек финалда грузиялық Кобе Карумидзеден жеңіліп, жұбаныш белдесуіне мүмкіндік алды. Бұл кезеңде қазақстандық балуан албаниялық Анди Муцаны 3:0 есебімен ұтты. Ал үшінші орын үшін өткен белдесуде Қырғызстан өкілі Барсбек Асанкожоевті таза жеңіспен ұтты.

130 келіге дейінгі салмақта өнер көрсеткен Джохар Узaров та қола жүлдеге қол жеткізді. Ол жартылай финалда ресейлік Әли Ильясовқа 0:5 есебімен есе жіберді. Алайда үшінші орын үшін белдесуде армениялық Арамаис Арутюняннан 5:1 есебімен басым түсті.

Еске салайық, бұған дейін Қазақстан құрамасының өкілдері Айбек Айтбеков (60 келі) пен Юсуф Ашрапов (72 келі) әлем чемпионы атанса, Темірлан Түрдақын (87 келі) күміс медаль жеңіп алған еді.

Біздің серіктес: Sport12kz