2 күн бұрын
Ербол Мырзабосынов күрес федерациясының жұмысын бағалады
Туризм және спорт министрі Ербол Мырзабосынов Қазақстан күрес федерациясының соңғы жылдардағы жұмысына тоқталып, өңірлердегі жүйелі өзгерістер мен жас балуандардың жетістіктерін атап өтті.
Министрдің айтуынша, күресте жоғары нәтижеге қол жеткізу үшін ұзақ мерзімді әрі жүйелі жұмыс қажет. Оның сөзінше, федерация қысқа уақыт ішінде өңірлердегі жұмысты реттеп, Күрес академиясын құруға кіріскен.
Сондай-ақ Астанада өткен конгресте федерация президенті Еркін Оқасов Біріккен күрес әлемі ұйымының (UWW) бюро мүшесі болып сайланған. Министр бұл оқиғаны Қазақстан күресі үшін маңызды жетістік деп бағалады.
«Бір-екі жылдың ішінде алтын медаль жеңіп алу өте қиын. Күресте жоғары нәтижеге жету үшін жүйелі жұмыс қажет. Менің ойымша, федерация қысқа уақыт ішінде өңірлердегі жұмысты жолға қойып, Күрес академиясын құруға кірісті. Астанада өткен конгресте федерация президенті Еркін Оқасов Біріккен күрес әлемі ұйымының (UWW) бюро мүшесі болып сайланды. Бұл – Қазақстан күресі үшін тарихи оқиға.
Жас спортшыларымыздың нәтижелері де қуантады. Биыл 23 жасқа дейінгі балуандар әлем чемпионатында үш алтын, ал 17 жасқа дейінгі спортшылар әлем біріншілігінде екі алтын медаль жеңіп алды. Бұл – болашақта әлемдік деңгейде бәсекеге түсе алатын мықты спорттық резерв», – деді министр.
Біздің серіктес: Sport12kz