57 минут бұрын
Ұлттық ұлан сарбаздары Астанадағы халықаралық күрес турнирінде өнер көрсетті
Астанада полиция қызметкерлері мен арнайы мақсаттағы бөлімшелердің әскери қызметшілері арасында еркін күрестен WRESTLING STARS LEAGUE халықаралық турнирі ұйымдастырылды. Жарыс 21 қарашада елордада алғаш рет өтті.
Бәсекеге 10 елдің өкілдері қатысып, бозкілемде әлем және құрлық чемпионаттарының, Олимпиада ойындарының жеңімпаздары мен жүлдегерлері бақ сынады.
Турнирдің ашылу салтанатына Ішкі істер министрі Ержан Саденовтың атынан Ұлттық ұланның Бас қолбасшысы, генерал-лейтенант Аңсаған Балтабеков қатысып, балуандарға сәттілік тіледі.
Қазақстан атынан Ұлттық ұланның екі әскери қызметшісі белдесуге шықты. 74 келіге дейінгі салмақта 6636 әскери бөлімінің ефрейторы Санжар Досжанов ресейлік Қазырық Сайынды 11:0 есебімен жеңді.
Ал 86 келіге дейінгі салмақта 5510 әскери бөлімінің офицері, аға лейтенант Санат Қайыргелді қырғызстандық Элнур Акыбаевпен кездесіп, 6:8 есебімен жеңіліп қалды.
Айта кетейік, WRESTLING STARS LEAGUE турнирі күштік құрылымдар өкілдерінің спорттық шеберлігін арттыруға, халықаралық тәжірибе алмасуына және күресті дамытуға бағытталған.
Біздің серіктес: Sport12kz