Бес дүркін Азия чемпионының жанайқайы: Жеңіл атлетикаға жағдай қашан жасалады?

Жеңіл атлетикадан Қазақстан ұлттық құрамасының мүшесі, кедергілер арқылы жүгіруден бес дүркін Азия чемпионы Аделина Земс жаттығуға қажетті жағдайдың жоқтығын айтып, дабыл қақты.

Спортшы әлеуметтік желідегі парақшасында қазіргі жағдайын жазып, қарсыластары стадионда дайындалып жатқан кезде өзі манежде жаттығуға мәжбүр екенін жеткізді.

«Қарсыластарым стадионда тыныш жаттығып жатыр. Ал мен облыста стадион болмағандықтан, манежде жүгіруге мәжбүрмін. Жолақтар үшін таласуға тура келеді, балалар жүріп, кедергі жасайды. Оның үстіне, қасымда бапкерім де жоқ», — деп жазды Аделина Земс.

Бұл мәселе бір ғана спортшыға қатысты емес. Ұлттық құраманың тәжірибелі спортшысы халықаралық жарыстарға дайындық кезінде осындай қиындықтарға тап болса, отандық жеңіл атлетиканың жалпы жағдайы туралы ойлануға тура келеді.

Қазақстан спортшылары халықаралық аренада жоғары нәтиже көрсетіп, ел намысын қорғауы үшін ең алдымен сапалы жаттығу базасы, қажетті инфрақұрылым және кәсіби бапкерлік қолдау қажет.

Спортшыдан медаль талап етпес бұрын, оған сол медаль үшін дайындалатын жағдай жасау керек.

Аделина Земстің жанайқайы жауапты органдардың назарынан тыс қалмауы тиіс.

Біздің серіктес: Sport12kz