Қазақстандық жеңіл атлеттер Ташкентте 26 медаль жеңіп алды

Өзбекстан астанасы Ташкентте жеңіл атлетикадан Орталық Азия чемпионаты өз мәресіне жетті. Құрлықтық додада Қазақстан құрамасы жоғары деңгейде өнер көрсетті.

Ұлттық құрама спортшылары байрақты бәсекеде 11 алтын, 9 күміс және 6 қола медаль еншіледі.

Виктория Ан 100 және 200 метрге жүгіруде топ жарса, Юлия Башманова 100 метрге кедергілер арқылы жүгіруде үздік атанды. Сондай-ақ Ұлболсын Есіркеп найза лақтырудан, Алина Чистякова ұзындыққа секіруден, Иван Иванов ядро серпуден чемпион атанды.

Үш қарғып секіруде Мария Ефремова мен Зелимхан Насыров алтын медаль иеленді. Михаил Литвин 400 метрге жүгіруде жеңіске жетсе, әйелдер арасындағы 4×100 метр эстафетада Қазақстан құрамасы бірінші орын алды.

Бұдан бөлек, қазақстандық спортшылар 9 күміс және 6 қола медаль жеңіп алды.

Осылайша Қазақстан құрамасы Ташкенттегі Орталық Азия чемпионатын 26 жүлдемен қорытындылады.

Біздің серіктес: Sport12kz