Олимпиада чемпионы Алиса Лю жарыстарға қатысудан бас тартты

Екі дүркін Олимпиада чемпионы Алиса Лю 2026/27 жылғы мәнерлеп сырғанау маусымында жарыстарға қатыспайтынын мәлімдеді.

21 жастағы америкалық спортшы бұл туралы әлеуметтік желідегі парақшасында хабарлады. Оның айтуынша, уақытша үзіліс спорттан кету дегенді білдірмейді. Лю осы кезеңді шеберлігін жетілдіруге және өнер көрсету мәнерін дамытуға пайдаланбақ. 

Америкалық спортшы жарыстан тыс уақытта жаттығуын жалғастырып, мәнерлеп сырғанаудың түрлі қырларына көңіл бөлетінін айтты. Атап айтқанда, ол жалпы орындаушылық шеберлігін, айналуларын және секірулерін жетілдіруді жоспарлап отыр. 

Людің бұл шешімі оның 2026 жылғы Олимпиададағы тарихи жетістігінен кейін қабылданды. Милан–Кортина Олимпиадасында ол әйелдер арасындағы жекелей сында жеңіске жетіп, кейін АҚШ құрамасымен командалық жарыста да алтын медаль иеленді. Осылайша спортшы екі дүркін Олимпиада чемпионы атанды. 

Сонымен қатар Алиса Лю 2025 жылы әлем чемпионатында топ жарған. Ал 2025/26 маусымында ол Гран-при финалында да жеңімпаз болды. 

Лю жарысқа 2027/28 маусымында оралуды жоспарлап отыр. Осы уақытқа дейін ол АҚШ құрамасындағы әріптестеріне қолдау көрсететінін жеткізді.

Біздің серіктес: Sport12kz