World Boxing Ресей боксшыларына қатысты шешім қабылдады

Халықаралық бокс федерациясы World Boxing жаңартылған әлемдік рейтингке ресейлік спортшыларды өз елінің туымен енгізді, деп хабарлайды Sport12.kz.

Ресей өкілдері бірнеше салмақ дәрежесінде үздік ондыққа енді.

48 келіге дейінгі салмақта әйелдер арасында Юлия Чумгалакова бесінші орынға жайғасты. Ерлер арасында 50 келіге дейінгі салмақта Баир Батлаев оныншы, ал 55 келіге дейінгі дивизионда Вячеслав Рогозин сегізінші орын алды.

Әйелдер арасында 65 келіге дейінгі салмақта Азалия Аминова Солтүстік Корея, Аргентина және Үндістан өкілдерімен бірге бесінші орынды бөлісті.

Аталған салмақ дәрежелерінде қазақстандық боксшылар да жоғары орындарда тұр. Назым Қызайбай 48 келіге дейінгі салмақта екінші орында болса, Санжар Тәшкенбай 50 келіге дейінгі дивизионда көш бастап тұр. Махмұд Сабырхан 55 келіге дейінгі салмақта екінші, ал Айда Әбікеева 65 келіге дейінгі салмақта екінші орынға жайғасқан.

Еске салайық, 30 шілдеде World Boxing ресейлік боксшыларға қатысты шектеулерді алып тастап, оларға халықаралық жарыстарда ұлттық туы және әнұранымен өнер көрсетуге рұқсат берген болатын.

Біздің серіктес: Sport12kz