Қазақстандық бокс бапкерлеріне арналған семинар өтті

Қазақстан бокс федерациясы жаттықтырушыларға арналған оқу-әдістемелік семинар ұйымдастырды, деп хабарлайды Sport12.kz

Аталмыш басқосуға еліміздің әр өңірінен 107 маман қатысты. Бес күн бойы олар отандық бокстың тәжірибелі өкілдерінен дәріс тыңдап, кәсіби білімдерін толықтыруға мүмкіндік алды.

Семинардың ерекшелігі - дәріс берушілер қатарында ұлттық құраманың әр жылдардағы бас бапкерлері мен отандық бокс мектебінің қалыптасуына үлес қосқан сала өкілдері де болды. Олар өздерінің көпжылдық тәжірибесімен бөлісіп, былғары қолғап шеберлерін даярлаудың қыр-сырына тоқталды.

Қазақстан бокс федерациясының жаттықтырушылармен жұмыс жөніндегі вице-президенті Қайрат Сәтжанов мұндай кездесулердің маңызын атап өтіп, бастаманың алдағы уақытта да жалғасатынын жеткізді.

- Қазақстан чемпионаты аясында ұлдар мен қыздар арасында жаттықтырушылардың біліктілігін арттыруға арналған семинар өткіздік. Оған еліміздің еңбек сіңірген жаттықтырушылары, кезінде ұлттық құраманы басқарған Дамир Буданбеков, Ғалым Кенжебаев, Мырзағали Айтжанов, Әлімбек Балмағанбетов және Нұрлан Ақүрпеков қатысты. Олар өздерінің білімімдерімен бөлісті. Сондай-ақ команданың бас психологы Әсем Әбдрешевa да дәріс оқыды. Бұл осындай форматтағы алғашқы бастама. Алда жасөспірімдер мен жастар арасындағы Қазақстан біріншіліктері кезінде де осындай шараларды өткізуді жоспарлап отырмыз. Біздің мақсатымыз - болашақта Азия, әлем чемпиондары мен Олимпиада ойындарының жеңімпаздарын тәрбиелейтін бапкерлердің шығуына жол ашу, - деді Қайрат Сәтжанов.

Бағдарлама аясында мамандар техникалық-тактикалық дайындықтың өзекті бағыттарын талқылады. Атап айтқанда, әртүрлі мәнерде жұдырықтасатын қарсыластармен айқасу, солақай боксшыларға қарсы әрекет ету, соққы дәлдігі мен күшін арттыру, рингтегі қашықтықты тиімді пайдалану мәселелері қамтылды. Бұған қоса, спортшылардың психологиялық дайындығына да назар аударылды.

Жалпы оқу курсы 20 академиялық сағатқа созылды.

Семинар соңында қатысушыларға Қазақстан бокс федерациясының арнайы сертификаттары табысталды.

Еске салсақ, World Boxing ұйымы қараша айындағы жаңартылған әлемдік рейтингті жариялады. Жаңа тізімде Қазақстан құрамасының төрт өкілі өз салмақ дәрежелерінде көш бастап тұр.

Біздің серіктес: Sport12kz