Роналдудың Португалия құрамасына оралуына қатысты шешім қабылданды

Сауд Арабиясының «Әл-Наср» клубында ойнайтын Криштиану Роналду Португалия құрамасының қараша айындағы матчтарға арналған кеңейтілген тізіміне енгізілді, деп хабарлайды Sport12.kz.

Бұл шешім футболшының ұлттық құраманың бас бапкері Жорже Жезушпен келіспеушілігінен кейін қабылданды.

Португалиялық O Jogo басылымының мәліметінше, 41 жастағы шабуылшы Дания мен Уэльске қарсы кездесулерге арналған алдын ала тізімге енген. Алайда Роналдудың ұлттық құрамаға түпкілікті оралуы туралы шешімді бас бапкер қабылдайды.

Еске салайық, қыркүйек айының соңында Роналду бас бапкермен келіспеушіліктен кейін ұлттық құраманың орналасқан жерінен кетіп қалған еді. Жанжалға Норвегияға қарсы матчтағы жағдай себеп болды. Сол кездесуде португалиялық футболшы алаңда қызды, бірақ ойынға қатыспады. Кейін ол бапкерді бұрын жасалған келісімді бұзды деп айыптады.

19 қазанда Португалия футбол федерациясының тәртіптік кеңесі шабуылшыға қатысты шешім шығарды. Роналду ұлттық құраманың орналасқан жерінен өз бетінше кеткені үшін 30 күнге шеттетіліп, 255 еуро көлемінде айыппұл алды.

Шеттету мерзімі 1 қазаннан бастап есептеліп, 30 қазанда аяқталады. Сондықтан Роналду қарашадағы матчтарға қатыса алады. Ол үшін футболшы ұлттық құраманың соңғы тізіміне енуі керек.

14 қарашада Португалия Брага қаласында Данияны қабылдаса, 17 қарашада Кардиффте Уэльспен кездеседі. Екі ойын да УЕФА Ұлттар лигасының топтық кезеңі аясында өтеді.

Айта кетейік, Криштиану Роналду Португалия құрамасы сапында өткізген матчтар мен соққан голдар саны бойынша рекорд иесі саналады.

Біздің серіктес: Sport12kz