Аргентина құрамасы Мессидің 10-нөмірін әзірге ешкімге бермейді

Аргентина құрамасының бас бапкері Лионель Скалони Лионель Месси ұлттық құрамада киген 10-нөмірді әзірге басқа футболшыға бермеу туралы шешім қабылдады. Бұл туралы TyC Sports басылымы хабарлады.

Қараша айында Аргентина құрамасы Уругвай және Коста-Рикамен жолдастық ойындар өткізеді. Осы матчтарда Мессидің нөмірі бос қалмақ. Себебі жолдастық ойындарда футболшылардың 1-ден 11-ге дейінгі нөмірлерді иеленуі міндетті емес.

Бұған дейін Аргентина футбол қауымдастығы Лионель Мессидің құрметіне 10-нөмірді ұлттық құрамада біржола қолданыстан шығаруды ұсынған еді. Алайда бұл бастама жүзеге аспады.

Алдағы уақытта әйгілі нөмірді «Комо» клубының жартылай қорғаушысы Нико Пас иеленуі мүмкін. Жас футболшы Мессидің ықтимал ізбасарларының бірі ретінде қарастырылып отыр. Дегенмен бұл жөнінде әзірге ресми шешім қабылданған жоқ.

Айта кетейік, Лионель Месси 2005 жылдан бері Аргентина құрамасында өнер көрсетіп келеді. Осы уақыт аралығында ол ұлттық құрама сапында 207 матч өткізіп, 125 гол соғып, 68 нәтижелі пас берген.

Месси Аргентина құрамасымен 2022 жылғы әлем чемпионатында жеңіске жетіп, Америка кубогын екі рет және Финалиссиманы бір рет иеленді.

Біздің серіктес: Sport12kz