Ташкенттегі футбол турнирі кезінде 16 қазақстандық бала ауруханаға жатқызылды

Өзбекстан астанасы Ташкентте өтіп жатқан «Dostlik Cup 2026» халықаралық футбол фестивалі кезінде Қарағанды облысынан барған 16 бала ауруханаға жатқызылды.

Оқиға 31 қазанда балалар орналасқан қонақүйде таңғы астан кейін болған. Жас футболшылардың дене қызуы көтеріліп, іші ауырған. Ата-аналарының айтуынша, таңғы ас кезінде жұмыртқа жемеген балалардың кейбірі өзін жақсы сезінген. Осыған байланысты улануға аталған өнім себеп болуы мүмкін деген болжам айтылды. Алайда оның нақты себебі әзірге ресми түрде анықталған жоқ.

Денсаулығына байланысты бірқатар жас футболшы 1 қарашада жоспарланған финалдық кездесулерге қатыса алмаған.

Қарағанды облысының дене шынықтыру және спорт басқармасының мәліметінше, медициналық көмекке 16 бала, бір жаттықтырушы және 11 ата-ана жүгінген. Барлығы 28 адам ауруханада ем қабылдап жатыр.

Қазақстанның Сыртқы істер министрлігі де жағдайдан хабардар екенін мәлімдеді. Ведомствоның хабарлауынша, медициналық көмекке мұқтаж Қазақстан азаматтарының барлығы Өзбекстандағы мамандандырылған медициналық мекемелерге жатқызылған. Оларға қажетті ем-дом көрсетіліп жатыр.

Қазіргі уақытта Қазақстан СІМ мен еліміздің Өзбекстандағы консулы жағдайды бақылауда ұстап отыр.

Біздің серіктес: Sport12kz