Испания чемпионатында «Атлетико» мен «Барселона» кездеседі

8 қарашадан 9 қарашаға қараған түні Испания чемпионатының 12-туры аясында Мадридтің «Атлетико» клубы өз алаңында «Барселонаны» қабылдайды, деп хабарлайды Sport12.kz.

«Атлетико» – «Барселона» матчының тікелей трансляциясы Қазақстан уақытымен сағат 01:00-де басталады.

Осы маусымда Испания чемпионатында 11 матч өткізген «Барселонаның» еншісінде 30 ұпай бар. Ал «Атлетико» дәл осынша ойыннан кейін 28 ұпай жинаған.

Өткен турда «Барселона» өз алаңында «Алавесті» 6:1 есебімен ойсырата жеңсе, «Атлетико» сырт алаңда «Левантеден» 2:0 есебімен басым түсті.

Одан кейін командалар Чемпиондар лигасында матч өткізді. Каталониялық клуб өз алаңында Англияның «Астон Вилласын» 3:0 есебімен сенімді түрде ұтты. Ал «Атлетико» Мадридте Германияның «Бавариясынан» 0:2 есебімен жеңіліп қалды.

Командалар соңғы рет сәуір айында Чемпиондар лигасының ширек финалында кездескен. Екі матчтың қорытындысы бойынша «Атлетико» 3:2 есебімен жеңіске жетіп (2:0, 1:2), жартылай финалға жолдама алған.

Біздің серіктес: Sport12kz