Тәжірибелі футболшылар бапкерлер курсына қатысты

Көп жылдық ойын тәжірибесі бар қазіргі және бұрынғы футболшыларға арналған UEFA C және В жаттықтырушылар курсының үшінші оқу модулі өтті, деп хабарлайды Sport12.kz

Бұл шара 10–13 қараша аралығында Астанада Қазақстан футбол федерациясының ұйымдастыруымен өтті.

Білім беру бағдарламасы қатысушылардың жаттықтырушы құзыреттерін жетілдіруге, жинақтаған ойын тәжірибесін кәсіби қызметте қолдануға және футболшыларды даярлаудың заманауи әдістемелерін меңгеруге бағытталған.

Үшінші модульде тыңдаушылар жаттықтырушы жұмысының әдістемесін, жаттығу процесін жоспарлау қағидаларын, қорғаныстағы командалық әрекеттерді ұйымдастыруды, шағын және орта топтардағы ойыншылардың өзара байланысын, сондай-ақ прессинг ұйымдастыру мен қорғаныстан шабуылға ауысу тәсілдерін меңгерді.

Сонымен қатар екінші және үшінші аймақтардағы қорғаныс әрекеттеріне, футболшылардың тактикалық өзара іс-қимылына және әртүрлі ойын жағдайларында шешім қабылдау дағдыларына ерекше назар аударылды.

Курстың тәжірибелік бөлімі шағын топтардағы жұмыс, жаттығу сабақтарын өз бетінше әзірлеу және оларды футбол алаңында өткізу жұмыстарын қамтыды. Қатысушылар өздері дайындаған жаттығуларды ұсынып, кері байланыс алды және таңдалған дайындық әдістерінің тиімділігін талдады.

Оқытудың мұндай форматы тыңдаушыларға теориялық білімдерін тәжірибе жүзінде қолдануға және жаттықтырушы ретінде оқу-жаттығу процесін ұйымдастыру дағдыларын жетілдіруге мүмкіндік берді.

Еске салсақ, Қазақстан құрамасының бұрынғы капитаны және «Оңтүстік Академия» командасының бас бапкері Азат Нұрғалиев шымкенттік «Ордабасының» спорттық директоры қызметіне тағайындалуы мүмкін.

Біздің серіктес: Sport12kz