Испания финалда Бразилияны ірі есеппен жеңді

Испания құрамасы футзалдан 2026 жылғы Финалиссиманың жеңімпазы атанды, деп хабарлайды Sport12.kz.

Рио-де-Жанейрода өткен финалдық кездесуде испаниялықтар турнир қожайыны Бразилияны 3:0 есебімен ойсырата жеңді.

Барлық гол матчтың соңғы бөлігінде соғылды. 32-минутта Кастехон есеп ашса, араға жеті минут салып Сесилио Испанияның басымдығын еселей түсті. Ал кездесудің соңғы секундында Антонио Перес қорытынды есепті белгіледі.

Сондай-ақ 39-минутта бразилиялықтар пенальтиді пайдалана алмады.

Бұған дейін үшінші орын үшін өткен матчта Аргентина Португалияны 3:1 есебімен жеңді. Айта кетейік, Португалия 2022 жылы турнирдің алғашқы жеңімпазы атанған болатын.

Біздің серіктес: Sport12kz