Қазақстан футзал құрамасы Беларусьтен ірі есеппен жеңілді

Қазақстан құрамасы 2028 жылғы әлем чемпионатының іріктеу кезеңінің негізгі раундында Беларусьпен екінші кездесуін өткізді. Матчта отандастарымыз 1:5 есебімен жеңіліс тапты, деп хабарлайды Sport12.kz.

Кездесу Словакияның Гуменне қаласындағы спорт залында өтті. Матчты португалиялық Криштиану Сантуш бастаған төрешілер бригадасы басқарды.

Қазақстан құрамасының бастапқы құрамы мынадай болды: Игита, Тұрсағұлов, Оразов, Төреғазин, Пиялы. Қосалқы құрамда Серіков, Кнауб, Уәлиуллин, Рашит, Ақбаликов, Эдсон, Қайырбай, Дуглас және Дерябин болды.

Беларусь құрамасы есепті жетінші минутта Владислав Селюктің голымен ашты. Оныншы минутта Алексей Пинчук есеп айырмасын арттырса, 13-минутта Виталий Шадурка үшінші голды соқты.

Екінші таймда Сергей Крыкун (29-минут) Беларусьтің басымдығын күшейтті. 37-минутта Қазақстан құрамасының ойыншысы Эдсон алаңнан қуылды. Кездесудің соңғы минутында Сергей Синицкий Беларусьтің бесінші голын соқты. Ал Ринат Төреғазин Қазақстан құрамасының жалғыз голын енгізді. Қорытынды есеп – 5:1.

Осы жеңістен кейін Беларусь құрамасы алты ұпаймен алтыншы топтың көшін бастады. Қазақстан үш ұпаймен екінші орында тұрса, Албания әзірге ұпай жинаған жоқ.

Топ жеңімпазы әлем чемпионатының элиталық кезеңіне тікелей жолдама алады. Екінші орын алған команда да рейтинг бойынша келесі кезеңге өтуі мүмкін. Қазақстан құрамасы келесі кездесуін 9 желтоқсанда Албанияға қарсы өткізеді.

Біздің серіктес: Sport12kz