Қазақстандық хоккейшілер үш дүркін Азия чемпионы атанды

Қазақстанның ерлер құрамасы хоккейден Азия чемпионатының жеңімпазы атанды. Оңтүстік Кореяның Чонджу қаласында өткен турнирде отандастарымыз барлық қарсыласын артта қалдырып, қатарынан үшінші рет алтын медаль жеңіп алды.

Талғат Жайлауов баптайтын команда соңғы турда алаң иелерімен кездесті. Ойынның негізгі уақыты мен қосымша кезеңінде екі тарап та шайба соға алмады. Чемпион тағдыры буллит сериясында шешіліп, Қазақстан құрамасы 4:3 есебімен жеңіске жетті.

Қазақстандықтар сапынан Артур Гросс пен Евгений Рымарев мергендік танытты. Рымарев буллитті екі рет дәл орындаса, шешуші соққыны Диас Гусейнов жасады. Қақпашы Владислав Нурек ойынның негізгі бөлігі мен овертаймда қақпасына шайба өткізген жоқ.

Қазақстан құрамасы үш кездесуде 8 ұпай жинап, турнир кестесінде бірінші орынға тұрақтады. Бұған дейін Жапонияны 3:2, Қытайды 5:0 есебімен жеңген еді.

Жапония құрамасы 6 ұпаймен күміс жүлдеге ие болса, Оңтүстік Корея 4 ұпаймен үздік үштікті түйіндеді. Қытай турнирді ұпайсыз аяқтады.

Осылайша, Қазақстан құрамасы IIHF ұйымдастырған Азия чемпионатының үш жылдық тарихында кезеткі мәрте чемпиондық атағын қорғады. Ұлттық құрама 2024 жылы Алматыда, 2025 жылы Бейжіңде топ жарған.

Біздің серіктес: Sport12kz