«Номад» Құрлықтық кубокты жеңіспен бастады

Астаналық «Номад» Құрлықтық кубоктың екінші кезеңіндегі алғашқы матчында италиялық «Азиагоны» 3:2 есебімен жеңіп, D тобында көш бастады, деп хабарлайды Sport12.kz.

Константин Пушкарев шәкірттеріне жеңіс әкелген шайбаларды Артем Королев (дубль) мен Кирилл Никитин соқты.

Кездесуде есепті алаң иелері Ник Порконың көмегімен ашты. Алайда Кирилл Никитин таразы басын теңестірді. Екінші кезеңде Королев астаналықтарды алға шығарғанымен, Марко Маньябоско есепті 2:2-ге жеткізді. Ал 57-минутта «Номад» ойыншысы аз құрамда өнер көрсетіп жатқанда шешуші шайбаны соғып, командасына жеңіс сыйлады.

D тобындағы екінші кездесуде датиялық «Херлев Иглз» румыниялық «Корона Брашовты» 2:1 есебімен жеңді. Бірінші турдан кейін «Номад» үш ұпаймен топ басына шықты. Дат клубының да еншісінде үш ұпай бар.

Астаналық команда келесі матчын 14 қарашада «Корона Брашовқа» қарсы өткізеді. Ал топтық кезеңді 15 қарашада «Херлев Иглзге» қарсы ойынмен аяқтайды.

Біздің серіктес: Sport12kz