Қазақстан мергендері әлем чемпионатында іріктеуді бастады

Стенд атудан Қатар мемлекетінің астанасы Дохада өтіп жатқан әлем чемпионатында «трап» жаттығуы бойынша іріктеу басталды, деп хабарлайды Sport12.kz .

ҚР Туризм және спорт министрлігі Спортты дамыту дирекциясының баспасөз қызметінің хабарлауынша, бәсекеде Қазақстан намысын алты спортшы қорғап жатыр. Ерлер арасындағы сында Әлішер Айсалбаев, Марк Почивалов пен Даниил Почивалов өнер көрсетсе, әйелдер сайысында Айжан Досмағамбетова, Наргиза Сарманова мен Элеонора Ибрагимова бақ сынайды.

Ерлер мен әйелдер арасындағы іріктеу кезеңі үш күнге, яғни 10-12 қараша аралығына жоспарланған. Іріктеу қорытындысы бойынша әр есепте ең үздік нәтиже көрсеткен сегіз мерген финалға жолдама алып, әлем чемпионатының жүлдесін сарапқа салады.

Әйелдер арасындағы финал 12 қарашада Астана уақытымен сағат 15:30-да, ал ерлер финалы 17:00-де басталады.

Айта кетейік, қазақ мергендерінің бұл дисциплинада айтарлықтай жетістіктері бар. Аичи-Нагояда өткен 2026 жылғы Азия ойындарында Қазақстан ерлер құрамасы траптан командалық сында қола медаль жеңіп алған. Жекелей есепте Әлішер Айсалбаев 7-орынға табан тіреген.

Бұдан бөлек, Даниил Почивалов пен Мария Дмитриенко 2023 жылы Бакуде өткен әлем чемпионатында траптан аралас командалық бәсекеде қола жүлде иеленген.

Еске сала кетейік, бірнеше күн бұрын әлем чемпионатында қазақ спортшысы Әсем Орынбай «скит» жаттығуы бойынша Лос-Анджелесте өтетін 2028 жылғы Олимпиада ойындарына жолдама жеңіп алды. Жарыс 14 қарашада мәресіне жетеді.

Еске салсақ, қазақстандық триатлоншы Дарын Қонысбаев 13 қарашада Әбу-Дабиде өтетін Әлем чемпионаты сериясының кезеңінде жарыс жолына шығады. Спринттік қашықтықтағы жекелей сайысқа 55 спортшы қатысады.

Біздің серіктес: Sport12kz