Бибісара Асаубаеваның жеңісі шахматтағы ірі сенсация деп бағаланды

Үндістанның The New Indian Express басылымы қазақстандық шахматшы Бибісара Асаубаеваның Будапештте өткен Total Chess World Championship Tour Pilot турнирінде Арджун Эригайсиді жеңуіне жоғары баға берді, деп хабарлайды Sport12.kz.

Басылым авторы бұл нәтижені классикалық рейтинг есептелетін партиялардағы соңғы жылдардағы ең ірі сенсациялардың бірі деп атады.

«Рейтингте қарсыласынан 200 ұпайға жуық басым болған Эригайси дебюттен кейін жақсы позицияға ие болды. Ақ фигуралармен ойнаған ол шағын басымдығын пайдалануға тырысты. Алайда шамадан тыс тәуекелге барды. Соның салдарынан позициясында құрылымдық әлсіздіктер пайда болды. Блицтегі шеберлігімен танымал қазақстандық шахматшы ойынға бар назарын аударып, бірінен соң бірі мінсіз жүрістер жасап, шешуші басымдыққа қол жеткізді. Ақырында мат қаупі күшейген соң үндістандық шахматшы жеңілгенін мойындауға мәжбүр болды», – делінген мақалада.

Басылым шешуші сәтте Асаубаева мен Эригайси арасындағы партияны бірден төрт камера түсіргеніне де назар аударды. Айта кетейік, сол залда әлемнің әйгілі шахматшысы Магнус Карлсен де өнер көрсеткен.

Біздің серіктес: Sport12kz