Астанада конкурдан Қазақстан чемпионаты өтеді

14-15 қараша күндері Астанада ат спортынан кедергілерден секіру (конкур) бойынша Қазақстан Республикасының чемпионаты өтеді.

Ел біріншілігі елордадағы «Арғымақ» ат спорты кешенінде ұйымдастырылады. Екі күнге жоспарланған жарыста шабандоздар әртүрлі биіктіктегі кедергілерден секіру бойынша бақ сынайды.

Жарыс бағдарламасына сәйкес, 14 қараша күні сағат 10:00-де чемпионаттың ашылу салтанаты өтеді. Одан кейін 10:30-да «А» тобы арасында 130 сантиметрлік, ал 12:00-де «В» тобы арасында 120 сантиметрлік маршрут бойынша жарыстар басталады.

15 қараша күні қатысушылар «А» тобында 140 сантиметрлік, «В» тобында 130 сантиметрлік кедергілерден секіреді. Бұл бәсекелер тиісінше сағат 10:00 және 12:00-де өтеді. Ал сағат 16:00-де жеңімпаздар мен жүлдегерлерді марапаттау рәсімі ұйымдастырылады.

Осылайша, екі күндік жарыста Қазақстан чемпионатының жеңімпаздары мен жүлдегерлері анықталады.

Біздің серіктес: Sport12kz