Қазақстан құрамасы жасөспірімдер арасындағы Дэвис кубогында ойын көрсетті

Қазақстанның теннистен жасөспірімдер құрамасы Мысырдың Каир қаласында 31 қазан мен 6 қараша аралығында өткен Junior Davis Cup Finals 2026 турнирінің финалдық кезеңіндегі өнерін аяқтады, деп хабарлайды Sport12.kz.

Жарыс қорытындысы бойынша қазақстандық команда әлемнің ең үздік 16 құрамасының арасында 11-орынға ие болды.

16 жасқа дейінгі жасөспірімдер арасындағы беделді командалық турнирде Қазақстан намысын Родион Трайгель, Ансар Ниетқалиев және Ахмади Маханов қорғады. Құрама капитаны – Сергей Квак.

Топтық кезеңде қазақстандық теннисшілер D тобында Франция, АҚШ және Үндістан құрамаларымен кездесті. Үш матчтық кездесудің барлығында Қазақстан құрамасы 0:3 есебімен жеңіліс тапты.

Плей-офф кезеңінде қазақстандық жасөспірімдер үш кездесудің екеуінде жеңіске жетті. Алдымен Қазақстан құрамасы Австралияны 2:1 есебімен жеңсе, кейін тартысты өткен кездесуде Венгрияға 1:2 есебімен жол берді.

Соңғы матчтық кездесуде қазақстандықтар Марокко құрамасымен шеберлік байқасты. Бұл қарсыласу Қазақстан құрамасының 2:1 есебімен жеңісімен аяқталды. Осылайша, отандастарымыз әлемдік додада қорытынды 11-орынға тұрақтады.

Айта кетейік, Қазақстан құрамасы Дэвис кубогының жасөспірімдер арасындағы финалдық кезеңіне Азия/Океания аймағындағы іріктеу турнирінде сәтті өнер көрсетіп, екінші орын алуының арқасында жолдама жеңіп алды.

Жасөспірімдер арасындағы Дэвис кубогы – 16 жасқа дейінгі теннисшілерге арналған әлемдегі ең маңызды командалық жарыстардың бірі. Турнирдің финалдық кезеңіне қатысу жас спортшыларға құнды халықаралық тәжірибе жинақтап, әлемнің ең мықты құрдастарымен кездесулерде өз шеберліктерін сынауға мүмкіндік береді.

Еске салсақ, бұдан бұрын қазақстандық теннисші Жібек Құламбаева Үндістандағы турнирде тарихи нәтижеге қол жеткізді.

Біздің серіктес: Sport12kz