Бокстан Қазақстан чемпионатына қатысушылар Таразға жетті

Бокстан ерлер және әйелдер арасындағы Қазақстан чемпионатының қатысушылары Таразға толық келіп жетті, деп хабарлайды Sport12.kz.

Командалар тіркеліп, техникалық жиын мен жеребе тарту рәсімі ұйымдастырылды. Жарыстың алғашқы күні - 30 қазан, ал финалдық жекпе жектер 6 қарашаға белгіленген.

Ел біріншілігі 30 қазан-6 қараша аралығында Тараз қаласында болады. Алдымен 29 қазанда жеребе тарту рәсімі өткізілсе, боксшылар 30 қазан -1 қарашада алдын-ала жекпе-жекте сынға түседі. Одан кейін 2-3 қарашада ширек финал болса, 4-5 қарашада жартылай финал белгіленген. Ал 6 қарашада боксшылар финалда бас жүлдені сарапқа салады.

Сондай-ақ басқа жас санаты бойынша да ел чемпионаттарының өткізетін орны мен нақты мерзімі белгіленді. Алдымен Ақтау қаласында U17 санатындағы спортшылар 7-13 қараша аралығында жүлдені сарапқа салса, U19 санатындағы жарыс 15-22 қараша аралығында Астана қаласында өтеді.

Ал U17 және U19 санатындағы әйелдердің бәсекесі 29 қараша мен 5 желтоқсан күндері аралығына жоспарланған.

Біздің серіктес: Sport12kz