«Қайрат» клубының жаңа бапкерлер штабы белгілі болды

Алматылық «Қайрат» футбол клубы Рафаэль Уразбахтин кеткеннен кейін команданың жаңартылған бапкерлер құрамын таныстырды. Бас бапкердің міндетін уақытша Жора Арутюнян атқарады.

Арутюнян 2013 жылдан бері клуб жүйесінде жұмыс істейді. 2024 жылдан бастап «Қайрат-Жастарды» жаттықтырып, биыл Бірінші лигада күміс жүлдеге қол жеткізді. Сондай-ақ клубтың U-19 командасын УЕФА Жастар лигасында баптаған.

Бас бапкердің көмекшілері болып Тимур Қасымов пен Владимир Плотников тағайындалды. Қасымов клуб академиясы мен «Қайрат-Жастар» сапында еңбек еткен. 2026 жылдың сәуірінен бері Қазақстанның U-19 құрамасында аға жаттықтырушы қызметін атқарып келеді. Ал Плотников «Қайрат» сапында қақпашы ретінде 114 матч өткізген. Биыл клубтың U-18 командасының бапкерлер штабына кірді.

Алексей Анкудинов жаттықтырушы-талдаушы міндетін атқарады. Ол бұған дейін клуб академиясы мен «Қайрат-Жастар» командасында жұмыс істеген.

Қақпашыларды дайындауға Илья Юров, ал ойыншылардың дене дайындығына Артём Савельев жауапты болады. Екеуі де негізгі командадағы қызметтерін жалғастырады.

Осылайша, «Қайрат» алдағы ойындарға жаңартылған бапкерлер штабымен дайындалады.

Біздің серіктес: Sport12kz