17.07.2026
Карпович «Елімайдың» еурокубоктан кетуіне қатысты мәлімдеме жасады
«Елімай» клубының бас бапкері Андрей Карпович Конференциялар лигасынан шығып қалғаннан кейін матчқа қатысты пікір білдіріп, жеңіліс үшін жауапкершілікті бүкіл команда өз мойнына алатынын айтты.
Маманның сөзінше, команда жанкүйерлердің үмітін ақтай алмағанына өкініш білдіреді.
«Мұндай матчтан кейін сөз табу оңай емес. Жанкүйерлерімізді қуанта алмадық, сол үшін кешірім сұраймыз. Бұл өте тартысты ойын болды, бірақ соңына дейін төтеп бере алмадық. Біз үшін бұл үлкен тәжірибе. Өз алаңымызда еурокубок матчын өткізу – клуб тарихындағы маңызды оқиға. Осы матчтың жоғары деңгейде ұйымдастырылуына атсалысқан барлық азаматтарға және жанкүйерлерге алғыс айтамын», – деді Карпович.
Ол команда ешкімді жеке кінәламайтынын және бас бапкер ретінде негізгі жауапкершілікті өз мойнына алатынын жеткізді.
«Біз кінәліні іздемейміз. Бұл нәтижеге бәріміз жауаптымыз. Бас бапкер ретінде мен толық жауапкершілікті өз мойныма аламын және кез келген шешімге дайынмын», – деді ол.
Карповичтің айтуынша, енді команданың басты мақсаты – Қазақстан чемпионатында сәтті өнер көрсетіп, келесі маусымда еурокубоктарға қайта жолдама алу.
Айта кетейік, «Елімай» Конференциялар лигасының алғашқы іріктеу кезеңінде Арменияның «Алашкерт» клубымен екі матч қорытындысында 3:3 есебімен тең түсіп, пенальти сериясында 5:6 есебімен жеңіліп қалды. Бұл семейлік клубтың тарихындағы алғашқы еурокубок маусымы болды.
Біздің серіктес: Sport12kz