ҚФФ ҚПЛ-2026 турындағы даулы төрешілік шешімдерге түсініктеме берді

Қазақстан футбол федерациясының (ҚФФ) төрешілік және инспекция департаментінің директоры Нуну Алешандре Паррейра де Каштру Премьер-лиганың 2026 жылғы 30-туры матчтарындағы даулы ойын эпизодтарына қатысты түсініктеме берді, деп хабарлайды Sport12.kz.

«Ұлытау» – «Атырау»

3-минутта айып алаңында қорғаушы №13 шабуылшы №17-нің жолын сол аяғын тосып, шалып тоқтатқан. VAR қайталауынан қорғаушының допқа ойнауға тырыспай, қарсыласының қозғалысына кедергі келтіргені көрінеді.

ҚФФ мамандары бұл әрекетті ереже бұзушылық деп бағалады. Сондықтан төрешінің пенальти белгілеу туралы шешімі дұрыс болған.

35-минутта қорғаушы №12 шабуылшы №20-ның жолына оң аяғын қойып, оны шалған. Баяу көрсетілген қайталауда қорғаушының допқа ойнауға мүмкіндігі болмағаны және қарсыласының аяғына кедергі келтіргені байқалады.

ҚФФ бұл эпизодта да пенальти белгілеу туралы шешімді дұрыс деп таныды.

45+1-минутта қорғаушы №12 шабуылшы №90-ның оң аяғына соққы жасап, оны құлатқан. Қайталаудан байланыс айып алаңының ішінде болғаны анық көрінеді. VAR мониторынан эпизодты қараған төреші бастапқы шешімін өзгеріссіз қалдырған.

ҚФФ төрешінің пенальти белгілеу туралы шешімін негізді деп бағалады.

«Жетісу» – «Астана»

69-минутта көк жейдедегі №4 ойыншы жоғары жылдамдықпен қарсыласына қарай секіріп, аяғын алға созған. Қайталаудан оның бутсысының ұшы қарсыласының балтырына, тобықтан жоғары тигені көрінеді.

ҚФФ бұл әрекетті қарсыластың қауіпсіздігіне қатер төндіретін өрескел ойын ережесін бұзу деп бағалады. Мұндай жағдайда футболшы алаңнан қуылуы тиіс.

Біздің серіктес: Sport12kz