«Қайрат» Чемпиондар лигасындағы алғашқы матчын өткізеді

28 қазаннан 29 қазанға қараған түні футзалдан Чемпиондар лигасының негізгі кезеңі аясында алматылық «Қайрат» латвиялық «Бейтар» командасымен кездеседі, деп хабарлайды Sport12.kz.

«Қайрат» – «Бейтар» матчының тікелей трансляциясы Қазақстан уақытымен сағат 00:30-да басталады.

Қос команда да Румынияның «Юнайтед Галати» клубы қаржылық қиындықтарға байланысты турнирден шығып қалғаннан кейін мерзімінен бұрын 1/8 финалға жолдама алды.

Осылайша, негізгі кезеңде «Қайрат» екі қарсыласпен ғана кездеседі. Екінші қарсыласы – Бельгияның «Андерлехт» клубы. Турнир ережесіне сәйкес, А лигасындағы әр топтан үздік үш команда плей-офф кезеңіне өтеді.

Айта кетейік, биыл Қазақстан атынан Чемпиондар лигасында «Семей» клубы да өнер көрсетіп жатыр. Оның негізгі кезеңдегі қарсыластары – Словакияның «Лученец», Испанияның «Барселона» және Швейцарияның «Минерва» командалары.

Біздің серіктес: Sport12kz