«Қайрат» Чемпиондар лигасын жеңіспен бастады

Алматылық «Қайрат» футзалдан Чемпиондар лигасының негізгі кезеңін латвиялық «Бейтар» командасына қарсы матчпен бастады. Кездесу 5:3 есебімен қазақстандық клубтың пайдасына аяқталды, деп хабарлайды Sport12.kz.

Бельгияның Роздале қаласында өткен ойында Азат Валиуллин 4-минутта есеп ашты. Кайо Руис 7 және 20-минуттарда гол соғып, екінші таймда 34-минутта хет-трик авторы атанды. Алмас Иманбеков те 21-минутта мергендік танытты.

Қарсылас сапынан Дмитрий Кузьмин дубль жасаса, қақпашы Максим Троицкий де бір гол соқты.

Осылайша, «Қайрат» топтағы үздік үш команда плей-оффқа шығатын турнирде 1/8 финалға мерзімінен бұрын жолдама алды. Бұған румыниялық «Юнайтед Галац» командасының жарысқа қатысудан бас тартуы себеп болды.

Алматылық клуб келесі ойынын сенбіден жексенбіге қараған түні бельгиялық «Спортинг-Андерлехтке» қарсы өткізеді.

Біздің серіктес: Sport12kz