«Семей» Чемпиондар лигасында «Барселонадан» ойсырай жеңілді

Қазақстандық «Семей» футзал клубы UEFA Чемпиондар лигасындағы екінші ойынын А жолының негізгі кезеңінде бүгін Испанияның «Барселона» командасына қарсы өткізді, деп хабарлайды Sport12.kz.

Кездесу барысында семейлік командадан Дедезиньо 25-минутта бір гол соқса, испаниялық команда сапынан Эрик 7, 34, Игор Соуза 18, Адольфо 27 Сухейль Мухудин 28, Антонио Перес 40-минутта мергендігімен көзге түсті.

Еске салсақ, бұдан бұрын семейлік клуб Словакияның «Лученец» командасын 6:0 есебімен қапы қалдырды.

Ал, испаниялық клуб бірінші турда Швейцарияның «Минервасын» 6:1 есебімен тізе бүктірді.

Үшінші турдағы ойынын семейлік клуб 31 қазанда Швейцарияның «Минерва» командасына қарсы өткізеді.

Сондай-ақ бүгін қазақстандық «Қайрат» (Алматы) жарыстың аталған сатысында 28 қазанда Латвияның «Бейтар» клубын 5:3 есебімен жеңді. Енді олар 31 қазанда Бельгияның «Андерлехт» командасымен кездеседі.

Жарыс ережесіне сәйкес әрбір топтан алғашқы үштікте тұрған командалар плей-офф сатысына шығады. Былтыр «Семей» мен «Қайрат» плей-офф сатысында сынға түсуге мүмкіндік алған еді.

Біздің серіктес: Sport12kz