Андрей Шутов Құрлықтық хоккей лигасында алғаш рет үздік болды

Қазақстандық «Барыс» командасының қақпашысы Андрей Шутов Құрлықтық хоккей лигасында өз мансабында алғаш рет айдың үздік қақпашысы атанды, деп хабарлайды Sport12.kz.

Құрлықтық хоккей лигасы чемпионатының үздік хоккейшілерін анықтау жөніндегі комиссия ҚХЛ Орталық ақпараттық бюросының статистика бөлімі ұсынған статистикалық деректер мен матчтарға жасалған аналитикалық бағалау негізінде қазан айының төрт номинация бойынша лауреаттарын анықтады.

Қазан айында 120 ойын өтті, оған 611 хоккейші қатысты (50 қақпашы, 199 қорғаушы және 362 шабуылшы). Айдағы орташа нәтижелілік - 4,88 шайба.айдың үздік қақпашысы болып мансабында алғаш рет Андрей Шутов («Барыс») танылды, ол жеті матчта бес жеңіске жетіп, сенімділік коэффициенті 1,7 болды. Оның қақпасына 221 соққы жасалды (бір ойында орта есеппен 31,6), оның 94,57%-ын қайтарды. «Сібірмен» (1:0) және минскілік «Динамомен» (1:0) ойындарда Шутов қақпасын құрғақ ұстады, ал «Спартакпен» (4:3 Б) ойында командасына буллиттер сериясында жеңіске жетуге көмектесті. Шутов 2018 жылдың желтоқсанындағы Хенрик Карлссоннан кейін ай қорытындысы бойынша үздік деп танылған «Барыстың» екінші қақпашысы атанды.

Айта кетсек, бұдан бұрын қазақстандық «Барыс» Құрлықтық хоккей лигасындағы кезекті ойынын бүгін, 30 қазанда Қытайдың «Шанхай Дрэгонс» (Шанхай) командасына қарсы өткізді.

Біздің серіктес: Sport12kz