Латвияда Ресей және Беларусь құрамаларымен ойнауға заңмен тыйым салынды

Латвияның хоккей құрамасы техникалық жеңіліс қаупі төнсе де, Ресей командаларына қарсы матч өткізбейтінін мәлімдеді, деп хабарлайды Sport12.kz.

Латвия тарапының ұстанымы елдің ұлттық заңнамасына байланысты. Бұған дейін Латвия Сеймі спорт туралы заңға түзетулер енгізіп, командалық спорт түрлерінен ұлттық құрамалардың Ресей және Беларусь өкілдеріне қарсы ойнауына тыйым салған. Бұл шектеу қарсыластар бейтарап мәртебеде өнер көрсеткен жағдайда да қолданылады.

Латвия хоккей федерациясы бұл талаптан бас тартпайтынын растады. Егер жеребе немесе турнир кестесі бойынша Латвия құрамасына Ресеймен кездесуге тура келсе, команда мұз айдынына шықпай, техникалық жеңілісті қабылдауға дайын.

Бұл мәселе Спорттық арбитраж соты (CAS) Халықаралық хоккей федерациясын (IIHF) Ресей мен Беларусь құрамаларын халықаралық турнирлерге қатыстыруға міндеттеген шешімінен кейін өзекті бола түсті.

Біздің серіктес: Sport12kz