Арман Царукян бұрынғы UFC чемпионымен титулдық белдесу өткізеді

Ресейлік-армяндық UFC файтері Арман Царукян (24-3) Real American Freestyle (RAF) күрес лигасындағы титулын америкалық Энтони Петтистен (25-14) қорғайды. Ол – UFC-дің бұрынғы чемпионы, деп хабарлайды Sport12.kz.

«RAF 15 турнирінің басты жекпе-жегі жарияланды! Арман Царукян 28 қарашада Чикагодағы NOW Arena аренасында Энтони Петтиске қарсы RAF Middleweight Crossover санатындағы титулын қорғайды», – делінген промоушеннің ресми парақшасында.

Қарсыластар еркін күрес ережесі бойынша белдеседі. Бұл кездесуде Царукянға тиесілі Crossover санатындағы орта салмақ белбеуі сарапқа салынады. Турнирді FOX Nation платформасынан көруге болады.

Царукян бұл титулды Лас-Вегаста өткен RAF 14 турнирінде жеңіп алған. Шешуші белдесуде ол америкалық Диллон Дэнисты 10:0 есебімен мерзімінен бұрын жеңді.

Ал Энтони Петтис – UFC және WEC ұйымдарының жеңіл салмақтағы бұрынғы чемпионы. Ол UFC 164 турнирінде Бенсон Хендерсонды бірінші раундта ауырту әдісімен жеңіп, чемпиондық белбеуге ие болған. Кейін Гилберт Мелендесті жеңіп, титулын бір рет қорғады. Алайда келесі жекпе-жегінде бразилиялық Рафаэл дос Аньосқа төрешілердің бірауыздан шығарған шешімімен есе жіберіп, белбеуінен айырылды.

Біздің серіктес: Sport12kz