Қазақстан чемпионатында бас бапкер жас волейболшыны ұрғаны үшін жарыстардан шеттетілді

Павлодарда өтіп жатқан волейболдан қыздар арасындағы Қазақстан чемпионатында бапкердің жас спортшыға қол көтергені белгілі болды. Оқиға бейнежазбасы әлеуметтік желіде тарап, қоғам назарын аударды.

Шымкент қаласының дене шынықтыру және спорт басқармасының хабарлауынша, жарысқа 2009 жылы туған және одан кіші спортшылар қатысып жатыр. Қала намысын бұл додада жекеменшік волейбол клубының командасы қорғаған.

Оқиғаға қатысы бар бапкер Хамит Мырзабеков екені айтылды. Қазақстанның волейбол федерациясы бейнежазба жарияланғаннан кейін оны жарыстарға қатысудан шеттету туралы шешім қабылдаған.

Спорт басқармасының мәліметінше, Мырзабеков жекеменшік клубта шамамен алты-жеті ай еңбек еткен. Клуб өкілдері оның жұмыстан босатылғанын хабарлаған. Ол мемлекеттік спорт ұйымдарында қызмет атқармаған.

Қазіргі уақытта қалалық басқарма жағдайды зерделеп, заңнама аясында тиісті шаралар қабылдау мәселесін қарастырып жатыр.

Біздің серіктес: Sport12kz