Манамада Қазақстан қоржыны тағы екі алтынмен толықты

Қазақстанның семсерлесу құрамасы Бахрейннің Манама қаласында өтіп жатқан 23 жасқа дейінгі спортшылар арасындағы 2026 жылғы Азия чемпионатында тағы екі алтын медаль иеленді, деп хабарлайды Sport12.kz.

Жоғары сатыға ерлер арасындағы семсерлесуден қылышпен емес, шпагамен сайысқа түскен команда мен әйелдер арасындағы қылыштасу құрамасы көтерілді.

Шпага бойынша ерлер командасының сапында Михаил Кузьмин, Кирилл Проходов, Георгий Тинников және Жанарбек Жанұзақов өнер көрсетті. Қазақстандықтар финалда Гонконг құрамасынан басым түсті.

Ал әйелдер арасындағы қылыштасудан Диляра Исабекова, Полина Ко, Әдемі Серікбай және Қайша Жәнібек жеңіске жетті. Шешуші кездесуде олар да Гонконг спортшыларын ұтты.

Сонымен қатар Қазақстанның тағы екі командасы құрлықтық додада қола жүлдегер атанды. Ерлер арасындағы қылыштасудан Бексұлтан Абжал, Қуаныш Ерғашбай, Ерхан Қараман және Қайназар Нұрқатұлы үшінші орын алды.

Әйелдер арасындағы рапира сайысында София Ақтаева, Ксения Андреева, Алёна Гноева және Алина Искандерова қола медаль жеңіп алды.

Жеке жарыста шпага сайысынан Мария Лесовская күміс жүлдеге ие болса, Полина Лесовская қола медаль алды.

Айта кетейік, бұған дейін Кирилл Проходов жеке сында шпага бойынша алтын, Қайша Жәнібек қылыштасудан күміс, ал Диляра Исабекова қола жүлде иеленген еді.

Осылайша, Қазақстан құрамасының Азия чемпионатындағы медаль саны тоғызға жетті. Оның үшеуі – алтын, екеуі – күміс, төртеуі – қола.

Біздің серіктес: Sport12kz