Қазақстандық мерген халықаралық жарыста тарихи межеге қол жеткізді

Қазақстандық мерген Ирина Юнусметова Дохада (Қатар) өтіп жатқан нысана көздеуден әлем чемпионатында қола жүлдеге ие болды. Бұл – Қазақстан құрамасының жарыстағы алғашқы медалі.

Отандасымыз әйелдер арасындағы 50 метр қашықтықтан малокалибрлі тапаншамен нысана көздеу бәсекесінде 537 ұпай жинады.

Юнусметова үндістандық Кавита Дхундиялмен бірдей нәтиже көрсеткенімен, ішкі ондыққа дәл тигізу көрсеткіші бойынша қарсыласынан басым түсіп, үшінші орынға тұрақтады.

Жарыста Түркия өкілі Севваль Илайда Тархан 546 ұпаймен алтын медаль иеленсе, Армения спортшысы Эльмира Карапетян 542 ұпаймен күміс жүлдегер атанды.

Осылайша, Ирина Юнусметова Қазақстан қоржынына әлем чемпионатының алғашқы жүлдесін салды.

Біздің серіктес: Sport12kz